政情：阿陶澄清：我冇打女人
衰運浪接浪嘅社民連，最近又被人惡搞。社民連前主席陶君行被人投訴，話佢因感情糾紛，喺灣仔一間會計師樓同一個女人大打出手，最後更由警員到場調停。陶君行接受我哋查詢時話，打人指控係子虛烏有，實情係會計師樓有男職員同女職員發生口角，佢只係勸交，大嘆好無辜。
我哋收到讀者投訴，話阿陶上星期同一個女人喺灣仔辦公室打交，之後警察到場，阿陶又唔認打人，女事主又無再追究，所以不了了之。咁究竟係咪真有其事呢？阿陶就同我哋講，事發當日只有三人，就係佢、佢助理同一個會計師樓女職員，其他兩人的確因為公事而嘈起上嚟，佢就負責勸交，但唔知點解勸勸吓就有差人上嚟，原來係隔籬屋覺得佢哋太大聲報咗警。
阿陶話由始至終都無打過人，亦無被人打過，所以都唔知點解會變咗「打女人」，真係莫名其妙。佢仲話，自己已經唔係區議員，都唔明點解咁多人攻擊佢，唔通自己好有價值咩？