政情：長毛大「貪」扑中英姐
近年班立法會議員都好興帶埋啲巨型示威物品入會議廳，特別係社民連梁國雄（長毛），多年來帶過嘅示威物品真係多到可以搞展覽。尋日煲呔曾出席答問大會接受議員公審，長毛就帶咗一塊同人咁大嘅「貪」字示威牌入場，會後托高抬走嘅時候，就唔覺意扑中勞聯李鳳英個頭，幸好唔係乜嘢硬物，英姐摸摸個頭就冇事，虛驚一場。
其實英姐喺以前中環舊立法會大樓內都曾經出意外，就係有次喺樓梯跣落嚟，傷及盆骨，手尾相當長，最終出院後要坐輪椅，仲要養傷多個月先至好番，認真唔好彩。講起示威牌，尋日公審大會亦發生咗段小插曲，工聯會黃國健（KK）一開始就向主席曾鈺成投訴，話佢哋以往試過喺座位附近擺放示威物品，結果被秘書處警告要收起，但尋日咁多人擺放示威道具，秘書處就唔理。由於時間緊迫，主席只係虛應投訴就算，KK為表達不滿，最後仲憤而離場添。