盧小姐早前乘搭城巴90號線，行車途中驚見車長竟邊操控軚盤、邊手持電話傾談，直至意識到被乘客注視始匆匆掛線，「揸私家車都唔可以拎住手提電話傾啦，呢啲係普通常識，更何況揸巴士？車入面有咁多條人命，個車長咁做真係好唔負責任！」
城巴發言人表示，車長駕駛時嚴禁使用手提電話或其他通話設備，亦不可佩戴手提電話免提裝置及耳筒，如遇特別情況方可使用免提裝置，或於停車時撥打電話。發言人續指，接獲轉介後已訓示有關車長必須遵守公司指引，並會派出便衣駕駛導師乘搭巴士，監察前線人員的駕駛表現及服務質素。
民間監管公共事業聯委會發言人蔡耀昌直指事態嚴重，擔心一旦發生意外後果堪虞，「其實個車長咁做已經犯咗法！何況作為公營運輸公司，更加要為道路安全負責！」蔡要求城巴必須切實執行承諾，密切監督員工表現，並同時加強培訓。