立法會尋日辯論係咪引用特權法調查特首候選人梁振英（CY）涉嫌喺西九比賽漏報利益事件，政府前晚漏夜披露更多文件，顯示除咗CY之外，仲有兩名評審員都重複多次投票畀被指同CY有關連嘅作品，變相還CY一個清白。文件同時透露，另有多位評審員重複投票支持天幕設計攞冠軍，須知天幕正係煲呔曾一直力撐嘅設計，如果動用特權法調查，火頭隨時燒番過煲呔曾度！所以一直堅貞保皇嘅民建聯，尋日就忽然轉軚對特權法議案投棄權票，繼「曾貪心」醜聞後再次公然包庇煲呔曾，認真無恥。
