政情：長毛隻豬選特首即瀨尿
特首選舉提名期終於結束，社民連主席梁國雄同八名成員尋日去選舉事務處示威抗議小圈子選舉。正當大家以為長毛會一如以往嗌吓口號嘅時候，佢突然嚟一個反高潮，喺個箱入面攞咗隻豬仔同大烏龜出嚟，話要帶佢哋參選特首喎，佢話豬代表候選人唐英年，烏龜就代表何俊仁，面對咁多鏡頭，大烏龜顯得好呆滯，隻豬仲嚇到瀨尿添！
長毛同曾健成等成員帶住豬仔同大烏龜到選舉事務處時，可能有大批記者同鏡頭包圍，隻烏龜呆吓呆吓，有時仲縮埋，相反隻小豬就畀人嚇到亂咁走，要靠示威者搵條繩拖實先至無走甩，之後仲突然瀨尿添，認真失禮。選舉事務處選舉主任都無長毛咁好氣，三兩句就輕鬆否決佢嘅申請。雖然長毛今次示威都算別出心裁，但就分分鐘畀人話佢虐畜，可能得不償失。