政情：曾慶淳學老竇攀龍附鳳
本報連日揭發煲呔曾接受富豪提供嘅海陸空款待，與富豪關係千絲萬縷，正所謂上樑不正下樑歪，呢種攀龍附鳳嘅品性延伸到下一代。日前被揭發利用禮賓府開生日派對，招呼城中富豪二代玩到癲嘅煲呔曾孺仔曾慶淳，多年前已同唔少富二代關係密切，最廣為人知就係佢曾經同遠東集團創辦人邱德根孫女、邱達昌女兒邱詠筠拍拖。
與邱詠筠曾傳婚訊
邱詠筠喺社交界非常活躍，曾慶淳亦間中出席一啲公開活動，雖然未知兩人喺乜嘢場合認識，但傳聞佢哋喺○八年已打得火熱，之後更加傳出婚訊。有傳聞話，煲呔曾喺○八年四月去日本東京及伊豆旅行時，「未來親家」都有同行，仲講到係兩家討論婚事，後來甚至連酒席都訂好，但唔知點解突然急煞車終止婚事，當中可能發生咗啲事都未定。
有傳話曾慶淳自呢段情緣後，感情似乎未有着落，好似佢喺禮賓府搞嘅生日派對咁，都被傳現場有大批女模助興，之後更同富二代一行人轉戰中環蘭桂坊附近嘅著名夜店，真係愈夜愈精彩。