政情:葉劉提質詢暗插「徒弟」

新民黨主席葉劉淑儀尋日喺立法會提出一條有關特首辦人手開支嘅質詢,發現原來特首辦喺一一至一二年度嘅薪酬開支,相比九七至九八年度增加約三成,至四千九百三十七萬元,人手編制亦由六十多人增至過百人,驟眼睇葉劉好似想揭示煲呔接管特首辦後變「大花筒」,但原來佢係一石二鳥,繞個圈質疑佢「徒弟」特首辦特別助理陳岳鵬過檔後嘅工作成效。

葉劉眼利,似係有備而來,佢發現特首辦喺新聞支援人手上有所增加,質問局方喺增加人手後有咩成效,對特首嘅民望、以及同傳媒嘅關係有咩改善等。

政制及內地事務局局長譚志源話增加人手後對特首辦工作有正面幫助,但工作成效就好難量化,而新媒體例如facebook嘅工作,對特首辦同各界聯繫起到幫助。話說葉劉上幾個星期已經喺報紙專欄暗插陳岳鵬過檔去特首辦,今次再轉戰立法會繞個圈質疑呢位「徒弟」嘅工作能力,似乎當陳岳鵬係叛徒多啲。

第一手消息請下載on.cc東方互動iPhone/iPad/Android/Windows Phone Apps

搵樓18即睇最新樓價走勢、最全面地產新聞及筍盤情報