中環出更：吳文華訂定機票去遊埠
天下無不散之筵席，今屆立法會經歷過嘅事實在太精彩，不過無論幾精彩都好，立法會秘書長吳文華（Pauline）經已鐵定做到九月尾約滿後同立法會講拜拜，做足心理準備嘅Pauline話，佢已經訂咗機票十一月去遊埠。至於秘書長繼任人選，最終可能係高官過檔都唔出奇。
幾十人應徵秘書長
Pauline尋日笑笑口話，佢已準備好同埋成班書友，包括退咗休嘅前食物及衞生局常任秘書長李淑儀，十一月頭去澳洲同新西蘭豪玩十日。下任秘書長嘅招聘上個月廿五日截止，Pauline話收到幾十人申請，包括現任高官。高官熟悉政府同立法會運作，過檔嚟立法會又唔使再受議員氣、畀議員鬧，呢份工睇嚟都有啲吸引力。
至於秘書處的雙J大熱，包括助理秘書長林鄭寶玲（Justina）同法律顧問馬耀添（Jimmy），其中Jimmy最終無應徵秘書長一職，一來佢都係鍾意依家份工多啲，加上佢想擺多啲時間，強化立法會前線法律顧問。