中環出更：傷健策騎會籌款 名人齊撐場
香港人熱愛賽馬，有冇諗過退役賽駒除咗返鄉下養老，仲可以留港做善事？為傷健人士提供策騎課程及培育殘奧馬術運動員嘅香港傷健策騎協會（RDA），過去一直接受香港賽馬會慈善信託基金源源不絕提供退役馬匹及小馬，日前RDA喺金鐘港麗酒店舉行周年慈善舞會，一眾城中名人齊撐場，話咁易籌到二百幾萬元善款。
是夜派對籌委會主席係百利建集團董事總經理陳正欣，陳太Angel悉心打扮去撐場，仲有馬會大董陳南祿夫婦、國泰航空企業事務董事莊偉茵、全國青聯副主席陳仲尼及靚太區海倫、前仁愛堂主席史立德夫婦、囝囝史昊洺及囡囡史佩加，而莎莎主席郭少明夫婦、佳能香港高級副總裁鄧慶治夫婦及囝囝鄧振豪亦現身打氣，現場衣香鬢影。
曾靝賜謝佩婷致辭感動全場
當晚最感人嘅時刻，莫過於有機會獲選出戰今屆殘奧馬術比賽嘅曾靝賜及謝佩婷上台致辭，兩人都係曾患腦積水同腦缺氧嘅早產兒，睇嘢、講嘢或行路都十分吃力。不過，佢哋以幽默輕鬆語氣描述加入RDA而重獲新生嘅故事，令賓客為之動容。
為咗支持RDA繼續行善，一眾善長一於熱烈競投三隻瑞士名錶，史立德以逾廿萬元投得全球搶先發售嘅新款名錶及飛機師夾克，仲好貪玩即刻着上身，朋友及子女爭相拍照留念，引起一陣小騷動。
卓妮