自從爆發僭建醜聞後，特首選舉候選人唐英年位於九龍塘約道嘅兩間大宅迅即成為香港新景點，雖然傳媒日日喺門外守候，但唐家大宅重門深鎖，外人根本難窺全豹。不過，有時愈唔想畀人見，就愈容易畀人見，唐宮內部嘅照片終於流出，洩密嘅竟然係唐唐自己個乖女。
唐唐啲囡囡年紀輕輕，當然好似時下年輕人咁喜歡玩社交網站facebook啦，我哋喺佢其中一個女嘅fb發現大量唐家大宅嘅內部照片，細女唐嘉慧喺相中同班朋友玩得好癲，一齊玩遊戲機Wii之外，仲瞓晒上床齊齊碌嚟碌去，可見佢同班朋友嘅關係相當唔錯。
睇番啲相，用色同設計，同早前曝光嘅唐家大宅嘅僭建地牢十分相似，材料主要係環保木，用色自然係啡啡黃黃，別有一番富貴風味，好明顯，主人就好想將間屋裝修到好溫暖咁。依家連唐家大宅內部都曝光，唔知下次仲有乜嘢相片同秘密流出呢？