中環出更：蔡敏思遊西安 吸帝王靈氣
首創香港男士護膚纖體專門店嘅香港青年聯會常務會董蔡敏思（Mence），卓妮見佢幾時都咁神采飛揚，梗係啦，省靚自家招牌嘛。今年經濟前景難測，Mence就特登同媽媽、妹妹Vickie及囡囡Shanice，喺本月中旬去咗古都西安玩足四日，皆因今年財位喺西方，此行吸盡帝王靈氣，希望全年行大運喎。
訪千年古廟兵馬俑
Mence話，今次係朋友自發籌組嘅行大運之旅，團員多達六、七十人，除咗造訪與秦始皇陵墓相距不遠嘅兵馬俑外，仲去咗好多千年古廟參拜，飽覽聞名世界嘅古都景點，又盡歎美食，玩得好盡興。佢話，西安係好多中國帝王陵墓之地，所以吸盡帝王靈氣，令財運勁上加勁。
Mence係靠治暗瘡起家，笑稱當年自創一套無痛針清手勢，備受貪靚又怕痛嘅客人歡迎，佢嘅「仙鶴神針」稱號遂不脛而走。依家香港青聯好多兄弟姐妹都幫襯佢，但就唔肯透露邊啲人咁貪靚。面對經濟不景，靚女話唔怕，事關市道唔好時，最好投資落健康，佢好精靈話：「因為投資健康贏梗嘛！」
卓妮