那些年，我們一起懷念的街邊大牌檔，已經不會在煲呔曾的腦海浮現！梗係，如今位極人臣而非「寂寞的推銷員」，「求其返吓工，富豪傍住鬆」，俗語說：官大一級壓死人，家陣係官大一級食死人，證諸內地的官爺們及今日香江的曾特首，有其共融互通之處。
煲呔曾原來唔打煲呔仲型，姣婆紅樽領襯螢光波鞋，已令吾人耳目一新，原來佢戴上「黑超」加頂黑色賊仔帽，老實講，如果加件黑色垂到膝蓋下嘅黑大褸，當年發仔Mark哥嘅《英雄本色》形象，風起時，飄衣甩髮，發哥恐怕也會給比下去！
四億船隊下濠江，百萬佳餚送上艇，大佬啊，唔需要比堅尼美女伴食，已經威到個個想同你做朋友啦！
講真，一年過幾次大海唔算過分，至於話佢「會歎盡呢份工」，以江湖大佬形象暴食濠江，依老朽話，亦識時務者為俊傑而已。
宋‧楊慎有酒令一首云：「有水也是溪，無水也是奚；去了溪邊水，加鳥便成鷄。得勢貓兒雄似虎，退毛鸞鳳不如鷄。」縮骨治港嘅煲呔曾，數口精到飛起，蠱惑買車勁慳稅逾二十八萬元。
夕陽政府，煲呔曾話就話萬千燈火慶下台啫，始終退毛鳳凰點都叻唔過隻鷄，老虎魚蝦蟹把握餘下幾個月貨仔，做隻得勢貓兒，有風不妨使盡，否則，有朝一日淪為放了氣的豬尿泡——軟下來，搵鬼可憐就遲喇！
施友朋