政情：伍士銓探月鑽嘴威到歐洲
發明家伍士銓一向潛心航天研究，上年佢獲歐洲航天局邀請，幫手設計月球探測車嘅鑽嘴部分，用嚟攞泥土樣本即場做分析。佢話月球南極啲土壤物質見光即死，極容易揮發同結冰，所以今次嘅設計，係特登將儀器頂部密封，令泥土樣本可完好保存。航天局嗰邊其實已經接納咗佢個設計，年尾通過埋測試後，等到一八年就可以正式探月，如果好彩分析出嚟啲物質啱使，仲分分鐘當埋火箭原料咁用喎！
本身係牙醫嘅伍士銓除咗幫病人用牙鉗整牙之外，日日都發夢希望搵到太空生物，所以好多研究都係一毫子唔收，只係為咗心中嘅一團火！佢又話自己並唔係啲乜嘢發明家，做人應該要謙厚少少，如果唔係，個天咩都唔會益你！伍士銓依家手頭上有成十幾單大工程，仲話要去發明機械人搵埃及王后墓室嘅秘密通道。哇！又做發明家，又做牙醫，又做盜墓者，一身兼三職，真係唔到你唔服！