政情：蔡加讚甜蜜遊杜拜
「玩具大王」蔡志明嘅囝囝、喜運佳鐘錶主席蔡加讚（Karson）尋日現身中環，接受一間電訊公司送上全城第一部4G智能手機。Karson精神氣色唔錯，原來佢過年時與靚女友汪圓圓把臂同遊杜拜，又啱啱過咗拍拖後第二個情人節，愛情滋潤嘅魔力沒法擋。
講起杜拜之旅，Karson話最難忘係遇上反常嘅天氣，原本諗住當地熱辣辣，於是帶咗泳褲等裝備去享受吓陽光與海灘，點知沙漠天氣多變，佢同女友去到之後，氣溫急降只得十幾度，凍到令行程變晒樣。不過，二人世界暖笠笠，Karson話此行玩得好開心喎。
啱啱過咗嘅情人節，Karson好有心思訂咗間餐廳同女友撐枱腳，又送上條珍貴項鏈，而女友就回贈一條親手做嘅飾物，Karson講起件禮物，個樣冧爆。愛情湯水滋補下，難怪Karson氣色咁好啦！