中環出更：博愛玩懷舊 上海灘重現
博愛醫院歷屆主席及總理嘅感情好融洽，有乜喜事都會慶祝一番，好似前主席黃帆風、同珍醬油後人王賜豪及圓玄學院副主席陳國超三位博愛人去年受勳，佢哋日前就喺尖沙咀喜來登酒店設宴，玩盡上海灘時代嘅懷舊風情。主席湯修齊、前主席蕭炎坤等人着住唐裝，令時光倒流半個世紀，賓客成晚爭唱《上海灘》、《夜上海》等懷舊金曲，氣氛熱鬧。
簡陳擷霞旗袍迎合主題
是夜《博愛一家 龍情上海夜》籌委會主席係蕭炎坤嘅囝囝蕭文豪，難怪原本喺澳洲黃金海岸享受緊陽光及海灘嘅蕭炎坤，幾歎都要提早返港撐囝囝。佢笑稱，喺黃金海岸掘唔到黃金，但就見到夕陽穿射細沙嘅迷人景色，有錢都買唔到喎。原來當日係陳國超嘅生日，湯修齊就準備咗一個大蛋糕，令壽星公感動不已。
當晚眾人情緒高漲，着住旗袍搭配白色披肩嘅總理簡陳擷霞，化身上海灘嘅名媛士女以迎合是夜主題，誠意十足，靚女們都爭住同佢影相。
而候任主席潘德明未正式上場就激勵士氣，獻唱振奮人心嘅《愛拼才會贏》，副主席陳李妮都難得上台獻唱，人靚聲甜搶晒風頭。
卓妮