政情：5‧29免費搭電車小輪
炒政府魷魚唔做政務官嘅袁莎妮（Shirley），轉任香港總商會總裁已經半年，佢做呢份工嘅一個重要任務，當然係要為呢間百年老店省靚招牌啦。佢諗住將去年總商會一百五十周年免費搭電車同天星小輪嘅好橋發揚光大，準備喺五月廿九日總商會一百五十一周年生日當日，全港電車同兩條天星小輪航線全日免費，佢話希望可以加深市民對總商會嘅印象喎。
Shirley話，今年做法係希望喺總商會生日嗰日，全日嘅電車同兩條小輪航線都係免費，而唔係好似去年咁，市民要等部分髹上總商會宣傳品嘅電車先至唔使畀錢。市民唔使畀錢當然好歡迎，唔知總商會係咪會循住呢個方向，爭住幫市民畀錢飲茶食飯，再省靚個招牌呢？
特首參選人唐英年前晚又提到佢嘅感情事，有人又重提同佢傳過緋聞嘅Shirley，不過Shirley尋日就話，一切同佢無關，○七年佢已經唔係唐唐嘅私人助理，佢講笑話無去過僭建嘅地庫，總之一切關於佢舊老闆嘅嘢，佢唔講喇。