政情：嚴迅奇聞西九快閃
被稱為添馬艦項目之父嘅著名建築師嚴迅奇（Rocco），尋日應邀出席立法會行政管理委員會為佢而設嘅午宴，一講起由佢親手打造嘅添馬艦新政府總部及立法會建築群時特別興奮和起勁，但一講到佢參加過嘅西九概念設計比賽時，立即雞咁腳走人。
對於自己一手一腳設計嘅浩瀚工程已經由草圖變成現實，Rocco笑笑口話，仲有好多嘢未搞掂，事關添馬艦項目嘅重點係開放成條海濱長廊畀市民享用，依家條長廊仍然在施工當中，難言任務完成，相信數年之後再講都未遲。
大家都知道Rocco參加過十年前嘅西九概念設計比賽，咁啱最近又爆出漏報利益風波，梗係問Rocco點睇呢件事啦！點知Rocco即時加快腳步離開，猛話唔關佢事喎。事件當然唔關佢事啦，因為佢只係參賽隊伍之一，又使乜驚得咁緊要喎！