政情：梁卓偉翻舊帳炳周一鑊
曾經係食物及衞生局副局長嘅現任特首辦主任梁卓偉（Gabriel），尋日出席一個青年人座談會時，分享自己由行醫到從政嘅經驗，點知佢行醫同從政內容就冇乜點講，但就狂踩前上司、食物及衞生局局長周一嶽。
Gabriel憶述在任副局長時，真係好似周局長個花名「周一鑊」咁，每日都有好多鑊要孭，仲記得自己第一日上任對住傳媒，傳媒根本無興趣聽佢嘅客套說話，只係追問佢點處理毒奶問題，認真無癮。
Gabriel又話，當年H1N1流感喺維景酒店爆發，佢本來放緊假，都要走勻晒各大電視台，向公眾解釋件事。
後來有朋友同佢講，從未見過一個香港官員，夜晚十一點仲上電視做直播，笑佢做「維景巨星匯」好過睇「維港巨星匯」喎。即係話佢就忙到甩轆，但周一鑊就冇晒影囉！