政情：鄉事派搵張學明爭新東
近日大眾焦點集中喺特首選戰，但對各大政黨嚟講，九月立法會選舉先至係重要戰場。我哋早前講過，新界東一班鄉紳拒絕再為民建聯（民記）抬轎助選，極力爭取自行派隊參選，但近日有消息話，西環終於出手打壓，力阻鄉事派出選。據講鄉事派為咗棟旗參選，屬意有民記背景嘅鄉議局副主席張學明，由原本參選開嘅新界西轉戰新界東，希望力抗強大嘅無形之手。
其實學明棄選新界西呢個風已經吹咗一、兩年，最近又有人舊事重提，起初有估計可能同佢身體狀況有關，或者真係想退休歎世界，但亦有消息話佢極有可能轉戰新界東，仲講到已經開始密密部署，成事機會好高添！至於點解學明要棄選新界西，有傳民記喺新西嘅勢力愈來愈大，除咗近年同鄉事派爭拗不斷，年初區議會主席選舉更趕絕鄉事派，唔爭在逼走埋學明。
韋國洪被勸退
至於新界東方面，鄉事派早已表明希望自行派隊參選，堅持同民記割席，最初原意係想派出前沙田區議會主席兼公民力量始創人之一嘅韋國洪出戰，但近日多個新界東鄉事阿頭都收到來自西環嘅「關心」，有鄉紳受唔住壓力，提出叫韋國洪唔好參選，令到新東派隊呢件事隨時難產。
鄉事派一向自稱愛國愛港，但就長期受忽視，今次西環打壓，皆因已有心儀人選，傳聞就係沙田區議員龐愛蘭，有人不斷威逼利誘公民力量同佢結盟，最終更唔排除要佢加入公民力量添。消息人士又話，力捧龐愛蘭，全因貪佢有藥劑師專業背景，情況咪又係複製上次九龍西嘅梁美芬模式囉，亦符合西環近年力谷專業背景人士參選嘅路向。
依家新界東個局勢相當清楚，就係鄉事派要出隊，只可以搵來自民記嘅學明先至有機會獲得批准，有鄉事派人士就話，只要可以自己派隊團結鄉事嘅勢力，由學明出選亦係一個好選擇喎。
其實學明喺新界東嘅支持度好高，贏面自然高，但可能會出現副作用，就係踢走龐愛蘭之餘，仲可能搶走民記陳克勤及葛珮帆嘅票源，但最終安排係點，就要拭目以待喇。