中環出更：非洲VCD之父 愛藏黑膠碟
黑膠唱片盛行嘅懷舊年代，沉澱咗好多人嘅集體回憶。曾經縱橫中港影視製作及戶外媒體行業多年嘅博愛醫院副主席吳俊華，當年因為要做配樂而買咗大量黑膠唱片，連已故歌手張國榮嘅黑膠唱碟都完好無缺。不過，隨着科技進步，黑膠唱片已成為絕響，那些年嘅懷舊品味就更加珍貴喇。
吳俊華享有好多行內第一，包括曾經風靡一時嘅戶外電視牆、第一隻雷射卡拉OK影碟，都係佢嘅傑作。十二年前，佢轉戰非洲尼日利亞，成立非洲第一條VCD、DVD生產線，「非洲VCD之父」嘅稱號不脛而走。今時今日，個個生意佬都話要北望神州，點解佢反而走去山長水遠嘅非洲搏殺呢？
投資惠州一肚氣
一提起內地，吳俊華就一肚怨氣，原來廿年前佢斥資五百萬元喺惠州淡水買咗塊地，諗住發展為影視城，無耐就被市政府徵用興建政府大樓，被迫換咗另一塊地，其後因其他原因又再換地，依家仍然得個吉，認真嘔血。難怪佢個心淡晒，疊埋心水去尼日利亞投資影碟，成為行業先鋒。所以話，只要有腦，處處有商機。