中環出更：中總青委團拜 奶茶代酒
中華總商會青年委員會日前喺中環中總會所餐廳舉行新春團拜，一眾青委不拘小節，以珍珠奶茶代酒，再配地道粵菜，夠晒新潮。青委主席、金利來集團副主席兼行政總裁曾智明（Ricky）唔止贊助自家精品抽獎，仲向兄弟姊妹大派新年利是，玩得好盡興。
余皓媛追隨爺爺腳步
當日現身嘅有青委副主席林智彬及王振宇醫生、「糖薑大王」余達之嘅孫女余皓媛（Grace）、前金銀業貿易場理事長李德麟嘅兒子李惟宏等。身為瑞銀（UBS）高層嘅Grace話，爺爺在生時係中總嘅中堅分子，所以佢都要追隨爺爺腳步，熱心投入社會事務，除咗中總之外，佢都加入咗好多其他商會及公益團體。
今年十月中總青委即將換屆，眨吓眼，Ricky已連任兩屆共四年主席，一眾手足都好唔捨得佢。至於到時交棒畀邊位青年才俊，依家仲未有定案。Ricky話，嚟緊五、六月青委將組團訪問北京，同全國青聯等組織交流，希望兄弟姊妹們到時踴躍參加喎。話時話，嗰個時間搞訪京團，莫非係為咗揀定邊個接棒？
卓妮