唐反口拒傳媒拍攝行宮

力撐「我冇講大話」

唐英年與妻子郭妤淺前晚一起向公眾交代唐門僭建醜聞，被人質疑「擺老婆上枱」。唐英年說：「過去兩、三日我的確覺得矛盾，個矛盾就係唔想人覺得我匿喺個女人後面……係預咗咁寫，睇咗之後唔好受，係難受架。我都係人，我都有感受。」唐又稱他近兩、三日的答案含糊是因為想「自己攬上身」，不想妻子被牽涉在內，並繼續死撐他沒有講大話，「呢個唔係誠信問題，誠信問題就係講大話，我冇咁做。」

對於被質疑僭建地下行宮是早有預謀，唐英年聲稱「地庫係○七年出OP（入伙紙）後先挖」，至於何時構思興建則「唔係好記得」。

根據一份曝光的建屋圖則顯示，唐門大宮的地基深達五米，而地庫的原先設計有和式浴室、影院、健身室等豪華設施。唐英年昨表示地庫並沒有該些設施，但沒有明確否認沒有酒窖，僅稱地牢是長方形間開兩邊、有沙包、一個大櫃放雜物用及可能有舊紅酒樽，他又稱︰「十九米乘十一米就係僭建規模，有咩需要知呢？」

唐英年前晚曾說考慮讓記者到大宅內拍攝，但不足一日即反口表示認為沒有開放的需要，「僭建就係僭建，違規就違規，你哋影相我都會拆架啦！」故「唔會開放畀大家影相同遊覽」，又否認不開放大宅並非想毀屍滅迹。