中環出更：陳仲尼呻「香港精神」怕曝光
香港叻人比比皆是，表揚傑出港人嘅「香港精神」活動，尋日舉辦第三屆啟動禮，過去兩屆已有十三位精神大使誕生，新一屆將會繼續選舉新大使人選。「升呢」做活動召集人嘅全國青聯副主席陳仲尼（Rock）坦言，依家搵叻人參選好困難，叻人唔係怕醜，就係怕出名，有獎都唔敢攞，所以佢呼籲市民踴躍提名，等香港精神得以延續下去。
講到香港精神，其實阿Rock本身就係一個好例子，事關佢嘅人生並非一帆風順，○八年曾因中風導致面癱，一度無法上班，幸好太太及家人悉心照料，在針灸及氣功雙管齊下治療，終於生猛番晒。佢話患病後明白人生無常，更珍惜家人，閒時服務社會，所以大會不妨考慮提名阿Rock做精神大使。
胡定旭封嘴
尋日啟動禮有幾位得獎者現身，仲有前召集人、華置副主席劉鳴煒，立法會議員梁君彥公子梁宏正，以及身為評審之一嘅醫管局主席胡定旭都嚟撐場。香港精神得來不易，但位高權重者卻毫不珍惜，好似特首參選人唐英年豪宅被揭嚴重僭建，誠信破產。作為唐營一分子嘅劉鳴煒及胡定旭，尋日都被傳媒「大逼供」，但兩人均封嘴，唔肯回應。
卓妮