政情：胡世全稱獲五選委提名
特首選戰愈演愈烈！前年喺五區「公投」循新界東參選嘅胡世全尋日宣布參選特首，準備同另外四位參選人砌過。大家咪以為聖名「提多」嘅胡世全玩玩吓，據佢所講，暫時佢已經攞到超過五個選委提名，不過係口頭上啫。
上次打住爭取二○一七年實現「雙普選」選立法會嘅胡世全，今次就以「行公義，好憐憫，存謙卑的心，與神同行」為口號角逐特首，佢話上次「公投」事出突然令佢準備不足，今次佢已經獲得至少五個來自基督教同醫學界選委提名，但為免選委尷尬，暫時姑隱其名。
雖然胡世全自知勝出機會渺茫，但佢都覺得相對其他參選人，自己「平民啲」，加上「人到中年，無乜所求」，希望透過參選為社會出力。
政綱方面，佢自言關注貧富懸殊問題，仲大鬧對手唐英年向長者派三千蚊嘅措施嘥錢，此外亦建議阻止賽馬會不斷擴大版圖，以免賭波活動禍害青少年，同埋要設立機制，畀市民罷免表現唔合格嘅高官、立法會議員同區議員喎。