政情：大字報唱衰「唐兄弟」

呢類大字報，上星期寫喺麻雀紙上面，已經喺九龍塘律倫街同金巴倫道出現過，今次更新咗一啲最新嘅內容，就係關於唐唐喺做財爺時買紅酒嘅事。大家行開街，不妨留意吓周街有冇好嘢睇。

反駁指抹黑 追問發爛渣

唐唐同林建岳都係富二代，兩人可以講係異姓兄弟，攬頭攬頸，最聞名嘅就係○七年當唐唐仲係財政司司長時，爆出佢坐林建岳嘅私人飛機歐遊。尋日喺天星碼頭出現嘅大字報，描述兩人嘅關係，內容包括紅酒呀咁，講到繪影繪聲，至於係真唔係，當然就只得佢哋兩個至知嘞。我哋問過唐唐同林建岳兩方面，唐英年競選辦就話唔就抹黑嘅材料回應，我哋打去林建岳嘅手機，佢原本就話開緊會，我哋道明來意，佢就好唔耐煩咁話唔再回應喇。早前喺九龍塘嗰次，林建岳當時就回應傳媒話，「有人編一套劇，自編自導且自演」。

尋日貼喺天星碼頭嘅大字報，除咗提及紅酒之外，仲講到林建岳同父母嘅關係。不過最重要嘅係，呢位自稱「愛港港人」嘅仁兄，其實係質疑唐唐「會是一個公平公正的人嗎？是會照顧香港老百姓的一個好特首嗎？請中央明察秋毫，徹查此事。」特首選舉提名好快開始，雖然只有千二人可以投票，但係呢啲市民嘅心聲，係唔係好有參考價值呢？同埋呢類爆料可能陸續有嚟，市民真係要拭目以待。