中環出更：潮店開幕 蘇永強雙喜臨門
尋日下午人潮湧湧嘅旺角朗豪坊好墟冚，事關備受城中潮男型女追捧嘅潮錶品牌odm概念店，正式進駐並舉行開幕式，現場氣氛好熱鬧。odm係時運達集團旗下自家品牌，老闆香港錶廠商會會長蘇永強（Paul）梗要親自嚟打氣，啱啱生咗BB個幾月嘅大女蘇漫瑩（Sarah），以及老公東興錶行董事總經理黃成藝（Jeffrey）亦現身撐場。新年伊始，Paul就抱孫兼且開新店，雙喜臨門，確係鴻運當頭。
大女蘇漫瑩湊「好」字
Paul見到囡囡將品牌零售業務打理得咁有聲有色，真係開心。Sarah啱啱坐滿月，氣色好好，佢已有一名三歲囡囡，加埋啱啱出世嘅細仔，正好湊個「好」字。佢老公Jeffrey來頭不小，係「深圳王」黃楚標嘅哥哥黃順源囝囝，黃順源喺內地投資地產、酒店及旅行社業務，Jeffrey接手東興錶行之後，大力發展分店網絡，現時喺旺區已有三間分店。佢話睇好市道發展，打算今年開多三間分店，雄心壯志，不可小覷。
卓妮