中環出更:廣東社團團拜共度元宵

廣東社團總會前日趁住元宵佳節喺灣仔會展舉行新春酒會,近五百位來自中港兩地嘅政商界名人齊現身撐場,主席王國強(KK)帶領眾人舉杯共慶佳節,場面熱鬧。

莊士集團太子爺莊家彬(Albert)同胞弟莊家豐(Edwin)都畀面現身湊熱鬧,Edwin啱啱喺紐約修畢建築碩士課程,返港過農曆新年兼做生意。佢喺中環開設咗一間建築設計公司,遲啲仲會喺泰國曼谷開分公司,趁後生大膽創業,佢話泰國人工平,而合作夥伴又喺泰國,因利成便。

莊氏兄弟似餅印

至於Albert,依家專注打理家族生意,做嘢勤力之餘,玩都一樣咁勤力,佢過年就同一大班朋友去咗加拿大滑雪,玩足七日,仲喺當地遇到唔少老友,玩得好盡興。原來兩兄弟無論高度同外形都非常相似,難怪Albert曾經被人點錯相,認錯佢係Edwin喇。

KK喺農曆新年就同一家人去咗新加坡度假五日,仲喺當地租咗間獨立屋住,游吓水兼食吓新加坡菜,享受天倫樂,非常寫意。

王國強享湊孫樂

KK話,十三個月大嘅孫仔啱啱識行,拖住佢隻手仔慢慢行,不知幾過癮。本身係金城營造集團主席嘅佢話,近年已經逐步將公司業務交畀紹基、紹恒兩個囝囝打理,一個管內、一個管外,佢就可以有更多時間做自己嘢。

卓妮同場仲見到潮州商會會長陳幼南,佢話近日忙於出席連串新春酒會,所以元宵節點都會偷偷哋返屋企同太太撐枱腳。

卓妮

第一手消息請下載on.cc東方互動iPhone/iPad/Android Apps
「Money18免費即秒股票報價網站」現推出8升級功能,財經資訊,實時實發!