政情：譚志源官訪迷失台灣
前政制及內地事務局局長林瑞麟年前訪問台灣，畀當地傳媒大玩佢嘅「人肉錄音機」外號，失禮港人。佢下手譚志源（Raymond）近日首次以政制及內地事務局局長身份率團訪台，又再爆出笑話，訪問團車隊一度迷失寶島，最後要台灣陸委會出手「營救」，認真唔好腳頭，希望由佢負責台港關係嘅未來發展唔會迷路啦！
話說Raymond一行人前日喺台北坐車到陸委會進行拜訪時，一度走錯路不知身在何方，最後要向陸委會接待官員求救，透過手機實時教路先至搵啱地方。Raymond尋日轉抵台中，出席「2012中台灣元宵燈會」開幕，並為香港旅遊發展局籌辦嘅香港燈區主持點燈儀式。
就喺臨點燈前，同台嘅台中市長胡志強忽然大喊一聲：「等一下！」原來佢係想叫埋Raymond嘅太太一齊上台點燈，認真有紳士風度同識得做騷，我哋班特區高官真係要學吓嘢。Raymond今日會同胡志強共進午餐，之後就完成訪台之旅返港。