政情：三鴿「砌」高官丟立會架
立法會尋日筵開十圍，請高官同議員飲入伙酒兼春茗，雙方仲一齊玩遊戲聯誼吓。點知代表立法會嘅民主黨李華明（肥仔明）、李永達同涂謹申，竟然輸咗畀官員隊，主場輸咗都不特止，仲要輸咗喺一個幼稚園水平嘅砌圖遊戲，真係乜架都丟清。
尋日玩嘅遊戲係來自立法會兒童天地畀幼稚園學生玩嘅砌圖遊戲，主要考吓玩家嘅公民意識。議員隊三名成員都抽中晒白鴿黨議員，官員隊則由金融管理局總裁陳德霖、行政會議成員查史美倫、運輸及房屋局常秘栢志高組成，點知兩分半鐘左右，官員隊就砌完，白鴿黨三子仍然手忙腳亂，敗陣收場。
白鴿黨玩輸咗，連牙骹都輸埋，被台下嘅立法會主席曾鈺成大寸「咁屎」，其後領取紀念品時被同僚勁噓，連佢哋嘅黨友張文光都笑笑口話：「三人退咗黨架喇，依家係民建聯嘅！」肥仔明仲死撐話，呢次咪畀官員威番次囉；而曾鈺成亦幫口話，呢次證明官員處理幼兒任務稱職過議員喎。