政情：煲呔曾腦退化 唔識哪吒?
仲有幾個月就退伍嘅煲呔曾，身體麻麻已經唔係新聞，好似我哋早前已經報道過佢患上大傷風，出入都要纜住條大頸巾保暖，去到立法會答問大會時又咳到死死吓，把聲都沙晒。雖然最近佢聲稱自己已經好得七七八八，但隨即又畀人踢爆佢記性奇差，見過幾次面嘅人都話唔認得，疑似患上腦退化症。
話說早幾日喺民政事務局新春團拜上，煲呔曾照舊逐一同班區議員握手，當握到去西貢區議員方國珊（哪吒）嗰陣，煲呔曾同哪吒你眼望我眼，煲呔曾講唔出哪吒個名，要睇一睇哪吒身上嘅名牌後，先至恍然大悟話：「啊，你係方國珊，久仰大名！」哪吒聽到後，當堂𤓓爆。
哪吒出唔出名真係見仁見智，而全港五百幾個區議員，煲呔曾唔認得晒都唔出奇，但哪吒同煲呔曾都唔算係一面之緣，事關○七年煲呔曾競選連任時，哪吒係助選團成員之一，煲呔曾有幾場宣傳活動，都有叫哪吒幫手。到○八年，西貢蠔涌灣發生嚴重車禍，煲呔曾同哪吒及地區人士都有到現場視察，當時哪吒仲企喺煲呔曾身後添！
如果咁都唔認得，一係煲呔曾白鴿眼唔放哪吒在眼內，利用完人哋就變臉扮唔識人，一係煲呔曾個腦退化得好犀利，竟然短短三、四年嘅事，都忘記得一乾二淨，可能過多幾年，佢連自己做過特首為禍港人都唔記得。
唐唐懶理堆填區爭拗
講起哪吒，大家都知道佢大力反對將軍澳堆填區擴建，最近佢就分別去信兩位特首參選人梁振英（CY）及唐英年，希望佢哋表明立場，幫手反對擴建。點知CY好快就回覆，支持反對擴建堆填區，但唐唐就連影都冇埋，當然連信都唔敢覆啦。
哪吒咁落力服務社區，目標當然係參選立法會選舉啦。佢話現時積極考慮出戰新界東，希望可以憑將軍澳呢個票倉，最少搶到一萬七千票，到時再夾埋新界東其他地區，粗略估計都攞兩萬票左右。佢仲話，自己屬於無黨派獨立人士，應該可以攞到一啲厭倦黨派之爭嘅中間票源喎。不過，依家新界東選情立立亂，個個都話自己夠票，唔通啲票喺天跌落嚟？