中環出更：陳年舊片證小吉美如昔
女人千方百計要留住青春，聽落相當難，但卓妮早幾日睇電視就發現全國政協委員方黃吉雯（小吉）美貌十年如一日。早幾日有電視台為咗呼應新一份財政預算案，搵番一九七九年訪問小吉講稅制改革嘅片段，當時小吉戴住大眼鏡，擁有一把長長嘅直頭髮，銜頭係稅務會計師，短片一出街，即時引起小吉同佢身邊朋友一陣騷動。
小吉前晚出席一個冠蓋雲集嘅新春酒會時，期間巧遇葵青區議會主席方平，方平一見小吉就上前打招呼，問小吉有冇睇到自己三十年前接受訪問嗰段片，仲猛讚小吉美艷如昔，睇落仲好似後生過以前咁話。試問有邊個女人唔鍾意人讚先，小吉一聽到方平咁講，即時展現甜絲絲嘅笑容，仲話好多朋友都睇到段片。
轟稅制30年冇寸進
被人讚美當然開心啦，但講起訪問內容，小吉就有啲嬲嬲哋，佢話短片已經超過三十年，佢當年建議政府容許市民將購買醫療保險及退休金供款列入扣稅項目，但呢啲可以拉近貧富懸殊嘅稅務改革建議至今仍未被採納，都仲係咁喎。所以話呢，政府就財政預算案諮詢各界意見，確係聽完就算。
卓妮