日前彩園邨保安員慘死事件成為全城焦點，記者趁尋日醫院管理局舉行新春團拜，紛紛追問食物及衞生局局長周一嶽有冇失職，豈料佢除咗回應慘劇外，對失職問題一概唔回應，但就失驚無神話有六件大事要講，聽真啲原來係佢任內嘅六大工作，唔知嘅仲以為佢捱唔到六月底任期，要幫自己埋單計數提早落台。
周一鑊連珠炮發話政府好關心公立醫護人手短缺、本港正值冬季流感高峰期，提醒市民要打流感針、又話「雙非」孕婦逼爆公立醫院，好大理由要調整收費；繼而更加無厘頭話《食物安全法》生效，叫入口商要守規矩，臨尾仲提醒市民排檔及骨灰龕諮詢期將屆滿，快啲提交意見添。新年流流無啦啦講骨灰龕，真係大吉利是過佢。
其實周一鑊仲有五個多月先執包袱，使乜咁早總結任內工作吖，有記者就忍唔住問佢係咪提早總結政績，佢就笑笑口話：「唔係，六月先總結都未遲！」究竟佢知唔知自己做緊乜嘅呢？