不過單雞尋日就表明心迹，話做呢啲位分分鐘係民主黨死亡之吻，所以根本唔諗住做，佢仲話黨主席何俊仁已經講明，任何白鴿人都唔使旨意做下屆政府內閣。睇嚟單雞都係疊埋心水選立法會，其他嘢真係諗吓好啦。
唐英年同白鴿黨關係向來都唔錯，所以政界先盛傳單雞會做局長。不過單雞就分析，三月嘅特首選舉，距離九月立法會選舉只得幾個月，若果有白鴿中人入咗政府做，下屆政府有乜差池，白鴿黨就會自吃苦果，對立法會選舉有好大負面影響。單雞今次立此存照，大家可以繼續留意事態發展。
單雞都好坦白話，自己同唐英年的確幾熟，有時仲會單對單食飯傾偈，但自從唐唐辭去所有政府職務後，兩人已經無見過面，所以自己絕對唔係「唐營」中人喎。