政情:麥美娟係後生版嫻姐?

銳意喺各級選舉上大展拳腳嘅工聯會,嚟緊立法會選舉陣容已基本大定,新界西由現任工聯會新界辦事處主任麥美娟(Alice)出戰。Alice從政資歷唔淺,不過大眾對佢仍然唔係太認識,好似早排佢孖住「票后」陳婉嫻出席活動時,竟然畀人認錯係嫻姐,仲話佢真人比上鏡後生好多。

街坊問養顏妙法

Alice話,佢早排出席完工聯會活動後,有個街坊突然上前同佢講,話佢個樣後生過上鏡好多,仲問佢有乜養顏妙法添,Alice心中一懍,估到呢位街坊十成係認錯人,再傾多幾句,先知道對方以為佢係嫻姐,登時令佢啼笑皆非,佢事後轉告嫻姐,對方亦都笑到哈哈聲喎。

除咗畀人認錯外,Alice早幾日孖住「工聯小花」劉桂容去到天水圍派新年風車時,竟然有街坊稱呼佢做「工聯大花」,Alice自己就笑言,小花自從區議會選舉擊敗李卓人後,個名傳到街知巷聞,佢自己都希望有呢個效果喎。講到咁白,想話你唔係喺新西出選都冇人信喇。

第一手消息請下載on.cc東方互動iPhone/iPad/Android Apps
「Money18免費即秒股票報價網站」現推出8升級功能,財經資訊,實時實發!