先講新界東，除咗早前講過嘅前沙田區議會主席韋國洪外，近日亦傳出大埔鄉委會主席文春輝亦有興趣代表鄉事派參選立法會，仲有傳聞話，大埔鄉委會副主席兼前民記立法會議員李國英有意退黨，瞓身支持鄉事派喺新界東出選，不過現時仍未有最後決定。
新界西方面，元朗十八鄉鄉委會主席梁福元早排喺區議會副主席選舉失利，該鄉幾位村代表早排就約見民記主席譚耀宗，投訴民記元朗區議會主席梁志祥出賣梁福元，投票畀第二個，點知譚Sir事後竟然向鄉議局副主席張學明投訴班村長，擺明就係反面。搞到依家一街仇家，民記最近仲話想喺新界西取三席，似乎真係諗多咗囉。