中環出更：田少新馬「反敗為勝」
新年新氣象，新馬迎新歲。尋日沙田馬場有唔少新馬上場，旅遊發展局主席田北俊愛駒「閃爍武士」都係其中之一，不過首度落場就畀馬恰，屈居第三，好彩最後上訴得直躍升第二，田少蝕錢變賺錢，穩袋近二十萬獎金，即時笑逐顏開。
話說該場賽事中，田少隻「閃爍武士」同另一匹馬「最著數」嘅騎師有身體碰撞，令到愛駒一度畀對方逼住發唔到圍，事後練馬師約翰摩亞即時向馬會投訴，經過十幾分鐘商議後，決定將「閃爍武士」躍升第二，「最著數」變第三，獎金亦由十萬變廿萬。
田少話，「閃爍武士」係英國馬，由練馬師精挑細選出嚟，適合跑長途，首次落場已經有咁好成績，佢自己都幾滿意。佢自爆落注三千蚊，本來跑第三會蝕錢，依家跑第二，仲賺多三千。講到馬名由來，田少話先幫愛駒改英文名「flash」，希望跑到好似閃電咁快，田太接住改中文名，但田少唔多識讀個爍字，所以要特別小心讀。