中環出更:黃英豪貼士:金價恐見頂

尋日係人日,即係眾人嘅生日,好多名人都入馬場消遣順便碰吓運氣發個新年財。成日對住黃金嘅金至尊集團主席黃英豪亦同埋家人入場為佢嘅愛駒打氣。對於踏入龍年金價馬上狂飆,黃英豪就話漲幅驚人,能否繼續呢股牛氣,就要靠消息嘅刺激嘞,例如歐債危機嘅發展、美國會否落實新一輪嘅量化寬鬆,同埋係咪向伊朗動武等。但若然缺乏呢啲因素,短期內都係1,650至1,750美元呢個範圍上落,換言之,現時嘅黃金價格隨時會見頂,考慮入市前真係要小心。

隨同黃英豪入沙田馬場嘅一眾親戚,仲有藝術發展局主席王英偉伉儷。黃英豪話王英偉嘅太太係佢爸爸黃乾亨嘅表妹,所以王英偉就係佢嘅表姑丈,分屬長輩。估唔到王英偉同黃英豪唔止姓名嘅粵語讀音相近,仲有親戚關係。

齊光華伉儷初七必食粥

另一位入場打氣嘅係黃英豪嘅生意拍檔吳傑莊(Johnny),身為IT人,Johnny對近日網上嘅中港罵戰都有留意。佢話今次嘅衝突,冰封三尺並非一日之寒,例如雙非孕婦就十分困擾港人,北大教授孔慶東嘅言論只係導火線。Johnny明白港人今次係好難受,但係就唔好因為一時之氣而加劇兩地嘅分化。因為大家都面對環球嘅不景氣,應該團結應對至啱。

趁住人日入馬場嘅仲有候任新界總商會主席齊光華伉儷,籍貫廣東嘅佢哋話,粵人有個傳統,年初七必定要食粥,取其諧音豐衣「粥」食。齊太話,以往嘅年初七佢哋一定會外遊,但係好多時身在外地冇粥食,點算好?佢哋會自備即開即食嘅粥同罐頭鮑魚,用熱水慶番熱就食得,真係諗得周到。

卓妮

第一手消息請下載on.cc東方互動iPhone/iPad/Android Apps
「Money18免費即秒股票報價網站」現推出8升級功能,財經資訊,實時實發!