政情:「搓胸」克勤教黃成智英文!

兩名新界東立法會議員陳克勤同黃成智,前者○八年當選後一句「Try our breast」,曾成為市民茶餘飯後嘅話題,後者最近連講一句完整嘅英文句子都成問題,成為網民最新嘅笑柄,搞到有人質疑新界東嘅從政人英文係咪特別差。其實克勤仔都知衰,近年努力研習英文,仲疑似自創咗幾招專門應付記者嘅英文提問,如今反充當老師教番成智轉頭,聽落得啖笑。

香港作為國際城市,中英兼備幾乎係從政者嘅最低要求,但最近成智開記者會以斷斷續續嘅英文句子回應遇襲事件,就畀網民寸爆佢英文差過小學雞,再度惹來市民關注從政人士嘅英語水平。我哋就此問過本身屬於過來人嘅克勤仔有乜意見,佢好厚道冇落井下石,反而視成智為同路人,鼓勵成智加把勁,之後仲疑似傳授幾招個人心得畀成智參考添。

克勤仔話,佢依家出席記者會前會因應發言重點,諗定幾句簡單英文以便有需要時可以即時運作,當面對有時未能將中文發言轉成英文時,克勤仔亦有秘訣,就係直接要求喺記者會後分開做訪問喎,未知同是天涯淪落人嘅成智會否參詳下克勤仔嘅招數,避免下次再出醜呢?不過,有政界中人教路,話如果啲英文真係唔見得人,就獻醜不如藏拙。

新東從政人外語特別差?

雖然克勤仔同成智令外界聯想到新界東從政人嘅英文好差,但其實只係一場巧合,因為曾經喺○四年循新東當選嘅自由黨榮譽主席田北俊,英文水平絕對係數一數二,只係四年前選舉失利而離開立法會。話時話,政界盛傳田少好大機會捲土重來參加九月立法會選舉,究竟佢能否成功重返議會提升新界東議員嘅英文水平,大家就要拭目以待喇。

第一手消息請下載on.cc東方互動iPhone/iPad/Android Apps
「Money18免費即秒股票報價網站」現推出8升級功能,財經資訊,實時實發!