政情：林D9擦阿姐鞋讚家英
門票火速售罄嘅西九大戲棚尋日開鑼，唔覺意做咗西九文化區管理局董事局主席嘅政務司司長林瑞麟（林D9），拉埋八和會館主席汪明荃、西九行政總裁連納智等，一齊出嚟主持開幕儀式，順道參觀一下。現場擺放咗多幅粵劇名伶穿着戲服喺鬧市拍攝嘅造型照，林D9一見到羅家英幅相，即時落晒鞋油盛讚家英哥係「靚仔小生」兼好威風，氹得汪阿姐相當受落。
林D9參觀過由竹枝搭成嘅戲棚之後話，現場好似時光倒流，好似細個阿媽帶佢去睇嘅棚戲，無論座位、小食等都重現眼前，難怪佢參觀小食攤檔時，忍唔住飲咗一支熱維他奶喇。林D9仲話，佢細個同媽咪睇嘅劇目有《帝女花》同《鳳閣恩仇未了情》，但尋晚做嘅劇目係《六國大封相》，睇嚟就唔多啱佢心水喇。