政情：施榮懷還神仆親入廠
農曆新年將至，又係去還神嘅時間，廠商會會長施榮懷（Irons）履新後都親自到多個廟宇還神，點知去到筲箕灣譚公廟還神時不幸遇意外，唔小心踢到墊腳嘅咕𠱸而失平衡，搞到成個人舂前趴咗喺地，眼鏡亦飛脫，好在咁啱附近有幾個救傷隊嘅人，即時出手相助，事後Irons亦有到醫院照X光檢查，最後好彩無乜大礙。
Irons尋日孖住該會立法會代表林大輝同傳媒聚會拜個早年，當Irons講番最近還神仆親事件時，聽到嘅人都替佢擔心，但原來佢已經唔係首次整親手腳，有次細個時同人喺飯枱打乒乓波都試過整親隻手，而且啲骨仲插咗出嚟，當時佢即刻扭番正啲骨，可謂藝高人膽大。
講到農曆新年外遊，原來Irons同屋企約二十人打算到泰國曼谷旅遊，但最近曼谷盛傳會遭受恐襲，所以為安全起見都決定取消行程，改到澳門玩番三日兩夜就算，其實去邊度玩都冇所謂，最緊要係開心啫。