政情：豬狼鬥獸棋決戰年宵
特首選戰幾乎淪為口水戰，大家悶悶地不妨去行吓花市，可能有意外收穫。維園年宵尋日開幕，唔少政黨都有擺檔賣嘢籌款，但啲精品比唔上民間智慧，我哋就發現一檔名為「龍頭大哥」嘅攤檔，設計咗一副「豬狼鬥獸棋」，寸爆政界中人，仲將兩位特首參選人化身鬥獸棋新角色，之唔係狼同豬囉！
設計呢副棋嘅沈先生話，因為特首選戰愈來愈激烈，所以佢有感而發將兩位「狼豬」參選人加入鬥獸棋，一來教育吓啲年輕人，二來畀人懷緬鬥獸棋呢個經典遊戲。除咗豬同狼外，沈先生話老鼠嘅角色早就諗定由專業會議立法會議員梁美芬擔任。梗係啦，梁美芬有名你叫鼠王芬嘛。
此外，香港人網都食住特首選戰，推出特首選戰版魚蝦蟹遊戲，香港人網主持愛明話，佢哋個遊戲好啱新年玩，大家可以自由選擇買邊個特首候選人勝出，但暫時未有現貨，事關批貨喺內地被扣關當中，想買嘅人就要等吓喇。