蘇錦樑（Greg）去年中當上商務及經濟發展局局長以來，建樹幾多大家心中有數。尋日佢拖埋成班公務員下屬出嚟同記者茶敍，致詞時如數家珍，數吓佢個局有幾咁多嘢負責，公平競爭法、規管不良營商手法嘅商品說明條例、免費電視牌照審批等，似乎真係忙到不可開交。不過其實上述幾樣嘢統統都講咗好耐，講到現屆政府得番五個半月壽命都仲未完成，難為佢仲拎出嚟晒。被問到明年仲同唔同傳媒茶敍，即是佢有無得留低時，佢就只笑不語，或者佢唔識答啩。
