政情：林鄭聞唐唐扮聾耳陳
上個禮拜特首選舉參選人唐英年高調批評市建局起埋晒啲「華而不實、貴到無倫」嘅樓，擺明係衝住發展局而嚟，發展局當日亦罕有發出新聞稿力撐市建局，明明係唐唐自己嘅責任仲要賴人，發展局局長林鄭月娥真係唔嬲就假。
林鄭尋日現身立法會發展事務委員會，完會後成班記者企喺立法會二樓(車立)口隔籬恭候佢。當林鄭行過，成班記者一輪嘴問佢覺唔覺得唐唐明恰市建局，又問唐唐依家踩完市建局又暗撐僭建，政府啲政策仲點維持落去。但好打得嘅林鄭一於無反應無表情，喺大班記者嘅連番追問之下企定定等𨋢。記者窮追猛打問：「依家你畀唐生踩到上心口喇喎，你都唔講幾句咩？」林鄭繼續好似借咗聾耳陳隻耳咁扮聽唔到。架𨋢好似同林鄭作對咁，等極都唔落嚟，氣氛都有啲尷尬o架。