中環出更：為着靚老西 方平狂瘦腰

廠商會常董方平為着Ermenegildo Zegna西裝，不惜減腰五吋；東華總理王賢誌（Vinci）就搵裁縫幫舊西裝「修身」，總之點都要瘦。

有靚衫睇，唔止女士雀躍，男人一樣high。方平自爆鍾情着西裝，曾試過搵師傅度身訂造，雖然啱身，但款式平庸無驚喜，尋尋覓覓，發現意大利名牌Zegna最合眼緣。但腰間三十八吋「士啤胎」難買褲，六年前決心減肥，幾年間瘦腰五吋，依家得番三十三吋，買Zegna西裝話咁易。簡直係削足適履嘅現代版本。

鄧達智為怕洗衫甩色麻煩，買衫一於要「黑」。

王賢誌將闊西裝統統改窄，提醒自己唔肥得。

王賢誌人衫齊修身

Vinci都加入修身一族，為着時興窄身西裝，努力keep fit，仲將舊西裝拎去改短改窄，時刻警惕自己唔肥得。

相比之下，著名時裝設計師鄧達智（William）就隨性得多。是肥是瘦，佢好少理，唯一要求係買衫首選黑色。恤衫西裝外套件件黑。理由係，撈埋一堆洗都唔怕甩色喎。

立法會議員謝偉俊（Paul）都妙論着衫。原來佢抗拒做衫，寧願見啱就買。阿Paul鍾情去巴黎入貨，貪當地款式多，價錢平，睇啱就一口氣掃十幾套，但佢謙稱近年好窮，好少再去巴黎瘋狂shopping嘞。

卓妮