政情：陳浩濂收一噸「富貴垃圾」
年近歲晚，係時候大掃除。山頂富人多，所謂「垃圾」，隨時係寶物。自由黨中西區區議員陳浩濂（Joseph）尋日搞咗個循環回收大行動，收到大籮「富貴垃圾」，當中不乏名牌LV旅行袋、Salvatore Ferragamo皮具及Brooks Brothers恤衫。
Joseph尋日中午喺山頂選區內嘅麥當勞道設立臨時回收站。呢度話晒係富人集中地，開檔無耐，「寶物」如雪花般飛至。唔少外傭由七人車送抵現場，搬出多袋用紅白藍膠袋盛載嘅舊衣物，亦有居民捐出一箱箱玩具、家電及舊書等。睇真啲，唔少回收物品好新淨，除不乏名牌貨，連「進身英國名校全攻略」嘅書都有。五粒鐘合共收到逾一噸物資，所有物品將經救世軍分發畀有需要人士。黨榮譽主席田北俊都冒雨撐場，睇見山頂居民咁有愛心，佢話好欣慰。
