立法會民政事務委員會尋日討論體育總會管治問題，有議員關注早前香港與俄羅斯青年代表隊賽事，爆出有球員利誘打假波嘅醜聞。民政事務局局長曾德成話，足球總會喺球賽開始前已通知當局有關事件，而涉及嘅球員亦冇落場，反映足總警惕性高喎。佢又自爆當日亦有到場觀賞球賽，仲意外發現新大陸添！
德成局長話，正因為爆出有球員利誘打假波事件，令佢睇波睇得好緊張，期間甚至質疑球證向球員出示黃牌係咪合理。點解佢會覺得球證出示黃牌會唔合理呢？原來佢當日先第一次聽聞非法賭波有一種玩法，就係可以賭球證幾時出黃牌喎！莫非德成局長仍然信唔過場波嘅公正性。
其實賭球證幾時出黃牌呢個玩法，已經存在咗好一段時間，通常出現於歐洲嘅大型足球聯賽，反而香港嘅非法賭波就好少咁樣玩法，所以市民唔知都唔出奇。
不過，曾德成作為負責足球同賭博政策嘅局長，對於呢啲非法賭波玩法都一知半解，似乎有啲脫節喎。