政情：社福女神助陣婦委會
早前鬧爆政府忽略婦女政策嘅婦女事務委員會主席高靜芝卸任，政府尋日宣布委任拔萃女書院校長劉靳麗娟做新主席，明日正式生效。
另外，婦委會仲委任四個新成員，包括喺特首選委會選舉中高票當選嘅社福界民主女神碧樺依，仲有港鐵事務經理梁陳智明。有靚女同猛人助陣，唔知婦委會日後向政府提出意見時會否「牙力」大啲呢？
即將上任嘅新主席劉靳麗娟原來做過唔少公職，可以話係經驗豐富。佢除咗做過六年婦委會委員之外，同時亦係大學教育資助委員會、社區體育事務委員會以及廉政公署事宜投訴委員會嘅委員。
至於四個新委員，除咗碧樺依及梁陳智明外，仲有大埔舊墟公立學校（寶湖道）嘅前校長林惠玲及油尖旺區議員黃舒明，黃舒明同時亦係九龍婦女聯會秘書長。新成員來自唔同背景，唔知會否為婦委會擦出火花呢？