政情：毓民揮拳打傷馮煒光？
台灣立法院不時都有肢體衝突，雖然呢股風潮早已傳到香港，但香港政界人物去到台灣發生衝突就好少見，點知尋日就發生咗一單。人民力量立法會議員黃毓民同民主黨中常委馮煒光一向都唔妥對方，咁啱兩人呢幾日又去咗台灣睇大選，點知狹路相逢爆衝突，馮煒光尋日下午就喺facebook（fb）聲稱畀毓民襲擊，仲打到眼鏡飛脫兼面腫腫添。
究竟發生乜事呢？先聽毓民個版本。佢話尋日下午一點幾鐘，雙方喺台北國民黨中央黨部狹路相逢，由於之前馮煒光喺fb發表一啲關於毓民個仔嘅言論，所以毓民上前質問對方，民主黨同行人士亦上前擋駕。毓民強調，自己最多係講粗口同手指指，絕冇打人，反而另外兩位人民力量義工就有受傷。
至於聲稱被襲嘅馮煒光就話，毓民去到國民黨總部門口，一見到民主黨黨員就問馮煒光喺邊，回頭見到佢即時揮拳相向，打到佢眼鏡飛脫，前後仲打咗佢兩次添。馮煒光仲強調，已經向台灣警方備案，尋晚亦已經去咗驗傷，仲話會要求國民黨提供閉路電視錄影帶作證喎。