政情：「清洗政總」煲呔曾腳仔軟
煲呔曾雖然五個半月後先至執包袱走人，但佢嘅政治能量早已蕩然無存，畀人當佢透明。唔知佢係咪不甘寂寞，尋日邀請全體立法會議員參觀添馬艦新政府總部及飲入伙酒期間，就懶幽默兼大言不慚，除咗好刻薄攞感染退伍軍人症桿菌嘅教育局局長孫公孫明揚嚟講笑外，仲搵中央嚟開玩笑，話當日爆菌後見報紙標題寫上「全面清洗政府總部」，就以為中央炒佢魷喎。煲呔曾講咁多嘢，究竟係心虛驚被提早炒魷吖？抑或想話畀人聽佢仲存在呢？
尋日餐入伙酒只係得半數議員出席，如果唔係煲呔曾眾叛親離，相信就係怕咗啲毒菌。煲呔曾致辭時聲沙沙咁叫大家唔使驚，話失聲完全同毒菌無關，佢自爆因為上京述職時冷親，返港後又同屋企人食飯食滯咗，之後去上海開會再冷親先至失埋聲喎。佢仲堅持自己無事，日日都有返工，只係做嘢嘅時候鬧吓呢個、鬧吓嗰個，打完個電話就搞成咁。
煲呔曾跟住入正題，話爆出毒菌後有日朝早，佢望見報紙標題寫上「全面清洗政府總部」，於是心諗「唔係嘛，北大人咁快？我嘅任期仲有五個半月，全部掃晒？」後來睇清楚原來係講緊清洗總部水管同儲水庫，先至冇咁驚喎。都唔知佢係懶幽默定係做戲，明眼人一聽就知佢係想話畀人聽，佢仲有五個半月先至「退伍」囉。
開孫公玩笑勁涼薄
煲呔曾愈講愈興起，話爆菌單嘢令大家學識好多嘢，但就唔好意思孫公被「祭旗」，講完再加幾聲冷笑，真係涼薄到非筆墨所能形容，好彩孫公喺新政府總部蕩失路，搵唔到路上會議廳，唔係實畀佢激親。
今次煲呔曾講嘢咁放肆，應該係有備而來，事後政府新聞處仲將佢嘅演辭原文照錄，並無「河蟹」粉飾演辭先至出街，足以證明煲呔曾係有心亂噏廿四。
高官私廁變新景點
唔少議員食飯前都參觀過新政府總部大堂同商務及經濟發展局局長蘇錦樑（Greg蘇）辦公室，但唔知點解唔安排參觀其他司局長辦公室，有人話可能係Greg蘇個私人廁所含菌量無咁高喎。無論如何，佢個私人廁所成為議員爭相參觀嘅景點。你話死唔死吖？大拿拿幾十億起個新政府總部，原來大家只係對個廁所感興趣。