政情：韋達誠訪院舍寫揮春
上任仲未滿月嘅港鐵行政總裁韋達誠（Jay Walder）認真唔得閒，除咗要掌握晒港鐵大大小小嘅事務外，仲要每個車站都去勻晒，頻撲到不得了。農曆新年就快到，韋達誠入鄉隨俗，同港鐵一班義工同事到訪一間長者中心，跟長者學寫好意頭嘅揮春，提早感受濃厚嘅中國春節文化。
韋達誠日前到訪鄰近港鐵彩虹站嘅東華三院龐永紹長者鄰舍中心，見到長者用中國傳統書法寫揮春，佢躍躍欲試玩埋一份。不過，用毛筆寫字一啲都唔易，中國人都要苦練過至寫得靚，何況係初來乍到嘅洋人呢？只見一位婆婆幫手扶實毛筆嘅上半部分，從上帶領韋達誠，似足教小學生寫大字。
農曆新年期間，港鐵將加密班次疏導人流，睇怕韋達誠又要忙到飛起喇！不過，今年應該係佢首次喺香港過農曆新年，佢好雀躍咁同大家拜早年，講聲：「恭喜發財」，仲祝市民有個快樂、健康及豐盛嘅龍年。